زاڭ جوباسىمەن سەگىز زاڭنامالىق اكتىگە وزگەرىستەر مەن تولىقتىرۋلار ەنگىزىلەدى. ولاردىڭ ىشىندە ەلىمىزدىڭ ازاماتتىق كودەكسى, بيۋدجەت كودەكسى, «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكس (سالىق كودەكسى), اكىمشىلىك قۇقىق بۇزۋشىلىق تۋرالى كودەكسى, سونداي-اق «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى», «جارناما تۋرالى», «مەملەكەتتىك م ۇلىك تۋرالى» جانە «كاسىپتىك وداقتار تۋرالى» زاڭدار بار.
زاڭ جوباسى اۋداندىق ماڭىزى بار قالالاردىڭ, اۋىلداردىڭ, كەنتتەردىڭ, اۋىلدىق وكرۋگتەردىڭ دەربەس بيۋدجەتىن, ياعني بيۋدجەتتىڭ جاڭا ءتورتىنشى دەڭگەيىن كەزەڭ-كەزەڭمەن ەنگىزۋدى, سونداي-اق جەرگىلىكتى ءوزىن-ءوزى باسقارۋدىڭ كوممۋنالدىق مەنشىك ينستيتۋتىن ەنگىزۋدى كوزدەيدى. جەرگىلىكتى ءوزىن-ءوزى باسقارۋ بيۋدجەتىن قالىپتاستىرۋ, بەكىتۋ جانە ورىنداۋ ءتارتىبى زاڭنامالىق تۇردە بەكىتىلەدى. جەرگىلىكتى ءوزىن-ءوزى باسقارۋ ورگاندارىنىڭ بيۋدجەت پروتسەسىن جانە جەرگىلىكتى ءوزىن-ءوزى باسقارۋدىڭ كوممۋنالدىق مۇلكىن باسقارۋ جونىندەگى وكىلەتتىكتەرى ناقتىلانىپ, تولىقتىرىلادى.
وزگەرىستەر مەن تولىقتىرۋلار ۇلتتىق حولدينگتەردىڭ جانە ولارمەن ۇلەستەس زاڭدى تۇلعالاردىڭ مەنشىگىن جەكەشەلەندىرۋ ەسەبىنەن ۇلتتىق قور قاراجاتىن جيناقتاۋدى دا قامتيدى. كۆازيمەملەكەتتىك سەكتوردىڭ ىشكى قارىز الۋى بويىنشا شەكتەۋلەر بولىگىندە دە وزگەرىستەر بار.
زاڭ جوباسىنىڭ جەكەلەگەن ەرەجەلەرى جەرگىلىكتى ماڭىزى بار اعىمداعى ماسەلەلەردى تالقىلاۋ ءۇشىن جەرگىلىكتى قوعامداستىقتىڭ جيىندارى مەن جينالىستارىن وتكىزۋگە قاتىستى بولىپ وتىر.
زاڭ جوباسى پالاتانىڭ قاراۋىنا جىبەرىلدى.
